Выспятак як дыягназ

Чакалася, што 31 студзеня лідары апазіцыйнай кааліцыі абвесцяць пра падпісанне дэкларацыі «Аб грамадскай дыскусіі пра мэты і формы ўдзелу беларускай апазіцыі ў выбарах 2012 года». Спецыяльна для гэтага на 12:00 была склікана прэс-канферэнцыя.

Аднак нечакана падпісанне пагаднення сарваў Віталь Рымашэўскі з Беларускай хрысціянскай дэмакратыі.

Афіцыйнай падставай для непадпісання стала тое, што Рымашэўскага запозна азнаёмілі з тэкстам дакумента. Як заявіў журналістам Рымашэўскі, тэкст дэкларацыі быў падрыхтаваны рухам «За свабоду», але ўзгоднены не з усімі ўдзельнікамі кааліцыі. Як піша агенцтва «Інтэрфакс», «ён адмовіўся патлумачыць, у чым заключаецца прынцыповае разыходжанне варыянтаў дэкларацыі».

Як стала вядома, пазіцыя Рымашэўскага настолькі раззлавала Аляксандра Фядуту з «Гавары праўду», што той даў яму выспятка. «З развароту», — перадаюць пікантныя дэталі відавочцы інцыдэнту.

У кааліцыю «шасці» ўваходзяць Аб'яднаная грамадзянская партыя (АГП), Партыя БНФ, Беларуская партыя левых «Справядлівы свет», аргкамітэт па стварэнні партыі «Беларуская хрысціянская дэмакратыя» (БХД), Рух «За свабоду» і грамадзянская кампанія «Гавары праўду!».

Вось як пракаментавалі гэтую сітуацыю для "Тут і цяпер" асобныя палітыкі.

Юрась Губарэвіч, намеснік старшыні руху "За Свабоду":

— Калі па сутнасці, то Рымашэўскі паводзіў сябе вельмі непрыстойна. Ён дапускаў абразлівыя выказванні ў бок не толькі Фядуты, але і ўсіх калег па кааліцыі. З яго боку гучалі абвінавачанні, што мы тут усе працуем на Лукашэнку, легітымізуем рэжым, усе мы агенты КДБ і г.д. Карацей, хлопца панесла. Усе прысутныя стараліся паводзіць сябе досыць стрымана. Аднак падчас развітання Рымашэўскі працягнуў руку Фядуце, а той рукі не падаў, бо абразы гучалі і ў яго адрас. У адказ на гэта Рымашэўскі пачаў "развітвацца", торгаючы Фядуту за гальштук, што было ўжо зусім зняважліва ў дачыненні да чалавека, які старэйшы за Рымашэўскага па ўзросце і куды больш аўтарытэтны па жыцці. Такое зняважлівае стаўленне і выклікала адпаведную рэакцыю спадара Фядуты. І ў дадзенай сітуацыі я цалкам на яго баку, бо хамства трэба прыпыняць.

Валеры Ухналёў, намеснік старшыні партыі "Справядлівы свет":

— Я не прысутнічаў на тым пасяджэнні і не магу сказаць, як такое адбылося. Думаю, што такія паводзіны характарызуюць іх не як сур'ёзных палітыкаў, а як людзей, якія спецыяльна правакуюць адно аднаго на эмоцыі і рэчы, што знаходзяцца па-за нармальным палітычным працэсам.

Віктар АЛЯШКЕВІЧ