Бабруйчан пакаралі за праваслаўе

У судзе Бабруйскага раёна і горада Бабруйска завяршыўся разгляд справы чатырох бабруйчан, якія на «Дзяды» хацелі памянуць рэпрэсаваных продкаў. Прысуд — 20 базавых велічынь.

Гэта было ўжо трэцяе пасяджэнне суда. На папярэдніх суд выслухаў тлумачэнні абвінавачаных, а таксама сведкавыя паказанні супрацоўнікаў міліцыі і настаяцеля Свята-Нікольскага сабора айца Аляксандра.

З чатырох абвінавачаных у судзе на гэты раз прысутнічаў толькі Арцём Мархасёў. Яму і была зачытана пастанова: прызнаны вінаватым у парушэнні ўстаноўленага парадку арганізацыі або правядзення масавага мерапрыемства (арт. 23.34 ч. 1 КаАП); налажыць адміністратыўнае спагнанне ў выглядзе штрафу на суму 700 000 тысяч рублёў (20 базавых велічынь).

Пастанова была адразу ж выдадзена яму на рукі.

Нагадаем, што ўвечары 2 лістапада чацвёра маладых бабруйчан — Алена Толсцік, Дзмітрый Толсцік, Арцём Мархасёў і Марыя Іванова —вырашылі памянуць усіх нявінна пацярпелых у часы сталінскіх рэпрэсій, сярод якіх былі і іх сваякі.

Маладыя людзі выйшлі вечарам са Свята-Нікольскага сабора — галоўнага храма Бабруйска — з запаленымі свечкамі ў руках і адразу трапілі пад аб'ектывы людзей у цывільным. А потым да іх падышоў афіцэр міліцыі і запатрабаваў патушыць свечкі, паколькі іх дзеянні нібыта прыцягваюць увагу іншых грамадзян.

Юнакі і дзяўчаты патлумачылі супрацоўніку міліцыі, што яны здзяйсняюць праваслаўны абрад памінання продкаў і накіроўваюцца да помніка ахвярам палітычных рэпрэсій, які размешчаны непадалёк ад храма.

У адказ на гэта ўсе ўдзельнікі абраду былі затрыманы і дастаўлены ў аддзел міліцыі, дзе на іх склалі пратаколы як на парушальнікаў закона аб масавых мерапрыемствах.

Каментар старшыні Бабруйскай гарадской арганізацыі Аб'яднанай грамадзянскай партыі Віктара Бузінаева:

— Пастанова суда мяне не здзіўляе. Маглі і 30 базавых велічынь даць, і 50. Маглі і ў лес завезці... Аб законнасці ў нашай дзяржаве казаць не выпадае. Тое, што ў нашай краіне зараз робіцца, — гэта поўнае самавольства і беззаконне.

Аляксандр КАСЦЕША