Горш за лідараў, лепш за аўтсайдараў

Футбольная зборная Беларусі, згуляўшы ў Бухарэсце ўнічыю з сапернікамі з Румыніі (2:2), ганебна завяршыла чарговы адборачны цыкл. Наша каманда пад кіраўніцтвам нямецкага трэнера Бернда Штанге чарговы раз не патрапіла ў лік 16 зборных, якія пазмагаюцца за медалі чэмпіянату Еўропы-2012 на палях Польшчы і Украіны.

Няспраўджаныя надзеі

Цыкл пачаўся шматспадзеўна: 3 верасня 2010 беларусы перамаглі ў Сен-Дэні фаварыта групы зборную Францыі (1:0), якая пасля скандалу на чэмпіянаце свету-2010 пазбавілася некалькіх зорных футбалістаў (Рыберы, Бензэма, Эўра, Насры, Абідаля). Аднак затым беларусы "зрабілі" бескаляровыя нулявыя нічыі з Румыніяй (дома) і Люксембургам (у гасцях), у якіх трэба было браць максімум — 6 ачкоў — альбо, прынамсі, 4. Хатняя перамога над албанцамі (2:0) дазволіла пасля чатырох матчаў мець 8 ачкоў і завяршыць 2010 год на другім месцы, з якога адкрываўся від на плэй-оф. Меркавалася, што французы, якія выйгралі тройчы запар, першынства ў групе не выпусцяць. Аднак у шасці матчах цяперашняга года беларусы выйгралі толькі адзін раз, двойчы згулялі ўнічыю і тройчы прайгралі, набраўшы ўсяго пяць ачкоў. Заключны двубой з румынамі ўжо нічога не вырашаў ні для гаспадароў, ні для гасцей.

У апошнім туры адбудуцца два матчы без удзелу зборнай Беларусі: Албанія — Румынія і Францыя — Боснія і Герцагавіна. Пераможца апошняга адразу атрымае пуцёўку ў фінальную стадыю ЧЕ-2012, а няўдачнік выйдзе ў плэй-оф і згуляе яшчэ два матчы. Пакуль жа табліца групы D выглядае так.

		Гульні	Перамогі	Нічыі	Паразы	Мячы	Ачкі
1	Францыя	9	6	2	1	14-3	20
2	Боснія і Герцагавіна	9	6	1	2	16-7	19
3	Румынія	9	3	4	2	12-8	13
4	Беларусь	10	3	4	3	8-7	13
5	Албанія	9	2	2	5	6-13	8
6	Люксембург	10	1	1	8	3-21	4

 

Кволая атака

Дастаткова ўважліва паглядзець на табліцу, каб убачыць прычыны няўдачы каманды Бернда Штанге. Калі па колькасці прапушчаных мячоў (7) у беларусаў другі-трэці паказчык, то па забітых (8) мы ў паўтара-два разы адстаём ад Францыі, Босніі і Румыніі! І гэта не выпадкова.

Практычна ва ўсіх матчах наша каманда выходзіла на поле з адным нападнікам, у ролі якога змянялі адзін аднаго Сяргей Карніленка (2 галы), Віталь Радзівонаў (1) і Андрэй Варанкоў (0). Магчыма, гэта было б апраўдана, калі б у нас на лязе атакі гулялі супербамбардзіры кшталту румына Муту (5 мячоў у адборачным цыкле), баснійца Джэка (3) альбо француза Бензэма (3). Паколькі форвардаў такога ўзроўню ў нас няма, слушна было б разлічваць на падтрымку вострых атакуючых паўабаронцаў, якімі ў нашай зборнай яшчэ не так даўно былі Максім Рамашчанка, Валянцін Бялькевіч, Аляксандр Глеб. Аднак цяпер такіх у нас не знайшлося. Да таго ж Штанге, імкнучыся ў першую чаргу зберагчы ад непрыемнасцей уласныя вароты, выпускаў на дапамогу чатыром абаронцам і варатару адразу двух апорных хаўбекаў — Аляксандра Кульчага і Яна Цігарава. Аднак Ян праз траўмы ў трох восеньскіх гульнях зборнай не ўдзельнічаў. Гэта значыць, што непасрэдна за абарону адказвалі сямёра, а да атакі звычайна былі датычныя тры-чатыры футбалісты. Вось і атрымліваецца, што абараняліся мы колькасцю, а не ўменнем.

У нападзе ж бракавала і таго, і другога. Роўна ў палове матчаў — пяці з дзесяці — беларусы не здолелі "распячатаць" чужыя вароты. Асабліва бездапаможна выглядалі нашы хлопцы ў вырашальных сустрэчах з камандай Босніі і Герцагавіны. Агулам за два матчы беларусы здзейснілі ўсяго два ўдары ў створ варот сапернікаў (па адным дома і ў гасцях), тады як баснійцы запісалі на свой рахунак 11 "стрэлаў" (5 і 6), тры з якіх сталі галявымі.

Зборная Беларусі ў адборачным турніры чэмпіянату Еўропы-2012

03.09.2010	Францыя - Беларусь	0:1
07.09.2010	Беларусь – Румынія	0:0
08.10.2010	Люксембург – Беларусь	0:0
12.10.2010	Беларусь — Албанія	2:0
26.03.2011	Албанія — Беларусь	1:0
03.06.2011	Беларусь — Францыя	1:1
07.06.2011	Беларусь — Люксембург	2:0
02.09.2011	Беларусь — Боснія і Герцагавіна	0:2
06.09.2011	Боснія і Герцагавіна — Беларусь	1:0
07.10.2011	Румынія — Беларусь	2:2

Нічога новага

Два гады назад зборная Беларусі на чале з тым жа Штанге таксама фінішавала чацвёртай у адборачным цыкле да чэмпіянату свету-2010. Нагадаем тыя вынікі: 1. Англія — 27. 2. Украіна — 21. 3. Харватыя — 20. 4. Беларусь — 13. 5. Казахстан — 6. 6. Андора — 0.

Як бачна, і тады, і цяпер беларусы набралі 13 ачкоў, а прахадны бал — у раёне 20.

Калі паглядзець усю гісторыю выступаў зборнай суверэннай Беларусі ў дзевяці адборачных цыклах, то толькі аднойчы нашым футбалістам удалося выйсці на трэцяе месца ў групе — гэта здарылася ў 2001 годзе пад кіраўніцтвам Эдуарда Малафеева. І ачкоў тады набралі найбольш — 15. Гэта наша столь. Вось ужо трэці раз запар зборная Беларусі — чацвёртая.

Зборная Беларусі ў адборачных цыклах (1996-2012)

Год	Ачкі	Месца
Чэмпіянат Еўропы-1996	10 11	4 (з 6 каманд)
Чэмпіянат свету-1998	10 4	6 (6)
Чэмпіянат Еўропы-2000	8 3	5 (5)
Чэмпіянат свету-2002	10 15	3 (6)
Чэмпіянат Еўропы-2004	8 3	5 (5)
Чэмпіянат свету-2006	10 10	5 (6)
Чэмпіянат Еўропы-2008	12 13	4 (7)
Чэмпіянат свету-2010	10 13	4 (6)
Чэмпіянат Еўропы-2012	10 13	4 (6)

 

Ужо вядома, што кантракт са Штанге не будзе працягнуты. Імя яго пераемніка пакуль не абвешчана. А вось сапернікі беларусаў у новым цыкле ўжо вядомыя: чэмпіёны свету і Еўропы Іспанія, Францыя, Грузія і Фінляндыя. У такой пяцёрцы стаць нават чацвёртымі будзе няпроста. Але пачакаем наступнага года.

Міхась МОШЫН